Categories
Subjects

الشرطة الاماراتية تتحدث الروسية

الشرطة الإماراتية تتحدث الروسية :

من كام يوم في محطة مترو مول الامارات كان في واحد روسي بيتخانق مع شرطي وكان صوته عالي وبيشاور على بنته الصغيره حوالي ٥ سنين كدا وبيشاور بايده انها قصيره ، يمكن مكانش عاوز يقطعلها تذكرة لان المترو ببلاش للاطفال اللي طولهم اقل من متر ، الله اعلم طبعا لانه كان بيتكلم روسي وصوته عالي والشرطي بيسمعه وسايبه يخلص كلامه ، واحد روسي تاني جه وقال للشرطي بالانجليزي انا اقدر اترجملك هوا عايز ايه راح الشرطي رادد عليه وقاله I speak Russian !

طبعا انا كبهير انبهرت ان في ظباط بتتكلم لغات !

طبعا مشيت ومعرفش الحوار خلص على ايه بس عجبني طولة بال الشرطي انه سمع الراجل للآخر ومتعصبش عليه حتى وهو صوته عالي وبيزعق في الشرطه قدام الناس 😀

بس كون ان انا شغال في شركة روسيه فحكيت الموقف دا للمدير تاني يوم وبقوله بقى وحاسس اني جايبله خبر هو ميعرفوش ” تخيل شرطه المرور بتتكلم روسي !”

قاللي مانا عارف !!

وحكالي بقى ان لما وصل عدد السياح والمقيمين الروس في سنه من السنين ل ٤ مليون فرد في دبي وكان فيهم عصابات مافيا هربانه فالحكومه خافت يعملو مشاكل( واخد بالك من خافت يعملو مشاكل دي ،مفيش حاجه واقعيا حصلت اصلا ) فراحو مقررين يعلمو الشرطه روسي عشان تبقى ودنهم في الشارع لو سمعو روس بيتكلمو عن حاجه غير شرعيه ! وبعتوا اتعاقدو مع شرطي متقاعد من الشرطه الروسيه عشان يعلمهم اللغه الدارجه والاسماء السريه للمخدرات والسلاح وطريقه كلام العصابات مع بعض .

Categories
Subjects

هولندا و رئيس جامعة ليدن

يعني إيه استاذ دكتور فيزياء ورئيس جامعة عايز يتعلم يبرمج ايفون ؟
يعني ايه يطلب من صديقي اللي يعرفني ويعرفه انه يستأذني اني اعلمه شويه حاجات عالسريع لو دا مش هيضايقني في اجازتي !
يعني ايه فعلاً يقعد معايا واقعد اشرحله واقوله اعمل كذا وكذا وكدا صح وكدا غلط وهوا متقبَّل دا عادي !
يعني ايه بعد الكلام دا يشكرني ويعتذر انو قطع اجازتي اللي المفروض اقطع فيها كل علاقتي بالشغل عشان اغير جو وارجع اشتغل بنشاط .
* يعني احنا عمرنا ما هنتقدم طول ما الناس الكبار فاكرين ان كلامهم حقائق مُسَلّم بيها وازاي عيال صغيره تعلمها او تعلِّم عليها
* يعني العلم ملوش سن معين ومفيش حد بيكبَر على العلم
* يعني الواحد لازم يفضل يتعلم كل جديد وميفضلش مسلِّم دماغه للي عرفه وخلاص على كدا .
الراجل الكُبَّره دا كان عايز يتعلم يبرمج ايفون عشان يعمل للطلبه اللي عنده برنامج يحل المعادلات ويعرفهم ازاي يتأكدو من حل المعادله ببرنامج بعد ما يحلوها بايديهم.
يعني الاستاذ لازم يواكب العصر ويتعلم الطرق الحديثة عشان يتفاعل مع الطلبه افضل ويعرف يوصلّهم المعلومه حتى لو في فرق عمر كبير بينو وبينهم .
افتكرت لما كانو اساتذة الكورسات بيحفظونا اجابات متناقضة لنفس السؤال عشان لو اتسألنا شفوي نجاوب الاجابه على حسب الدكتور ، يعني اساتذة الجامعه اللي هم (المفروض) انضف عقول في البلد ، كل واحد منشف دماغة وشايف ان رأيه هو الصح و المفروض عشان تنجح (تنافقه) وتقوله الاجابه اللي بتعجبه رغم انها غلط !

ربنا يقدّرنا على العلم والتعلم والتعليم ويرزقنا حب العلم والعمل .

 
 
 
Categories
Projects

تجهيز حملة نستلة الدعائية

الحمد لله الذي بنعمته تتم الصالحات
قمت اليوم بانهاء ١٥ نسخه مبدئية”prototype” من جهاز قياس المسافات والاستشعار عن بعد “ATN003” وسوف يتم شحنة وتركيبه في اجهزة نستلة الدعائية في دبي ، ابوظبي ، الدوحة ،جدة ،الرياض و بيروت .
يتصل الجهاز ببرنامج كمبيوتر عن طريق البلوتوث قمت بتصميمة وبرمجته بالاضافة لبرمجة وتركيب الهاردوير .
ملحوظة : ATN اختصار Ahmed T.Nabarawy

‫#‏المخترع_الطبيب‬

 
 19786_10152870623651227_158598904071678936_n 1544540_10152870623716227_5731271212622918705_n 11667492_10152870623636227_3519314788099734277_n
Categories
Projects

جهاز اعتراض الاشارت السلكية

مهندس برمجيات حاصل على بكالوريوس طب يقوم باختراع جهاز يستطيع اعتراض الاشارات السلكية وفك شفرتها ومحاكاه اشارات المصدر والتحكم فيها لاسلكيا عن طريق البلوتوث ، ويمكن إستخدام الجهاز في توليد الطاقة الكهربية من قشر الموز .
#المخترع_الطبيب


All kidding aside , my first note worthy hardware creation , Cat5 Signal Interruptor ,Translator and repeater through Microcontroler ,custom circuitboard , Bluetooth shield abd c++ software .

11030150_10152621050266227_6142606429570265553_n

 

Categories
Projects

حلقة دبي للتزحلق و حملة نيدو

شركة نستلة من الشركات المتميزة جداً في مجال الدعايا لمنتجاتها وعندهم فريق كبير كل شغلتة انه يفكر في افكار جديدة ومبتكرة للتسويق لمنتجاتها ، بس معندهمش فريق لتنفيذ الافكار دي عشان كدا بيتعاقدو مع شركات تانية تنفذ الافكار بتاعتهم.
كان ليا الشرف اني أكون المنفذ لأحد الأفكار دي .
نستلة كان عندهم فكرة للناس اللي بتشتري لبن نيدو لأطفالهم ، كانت عايزة تجذبهم بطريقة تخليهم يوعدو انهم يفضلو يستخدمو لبن نيدو لغايه ما اطفالهم يتمو ٣ سنين ، طب يخلوهم يوعدو ازاي ؟ قالك هنجمع توقيعات الناس اللي عندهم استعداد يوعدو بكدا وفي المقابل كل واحد يوعد الشركة تقدم ٧ كوبايات لطفل محتاج .
طب يجمعو الوعود دي ازاي ؟
عملتلهم ابليكيشن عالايباد ، يخلي الاباء او الامهات يتصورو سيلفي مع القلب الدهبي اللي هو اللوجو بتاع نيدو ويكتبو اسمهم وايميلهم وبكدا يبقى وعدو .
وفي عداد بيعد عدد الناس اللي وعدو وفي نفس الوقت الصورة السيلفي دي بيتعمل عليها تعديل بالبرمجة بحيث انها تندمج جوة صورة الوجو نفسة وتظهر عالشاشة وتتبعتلهم عالايميل ،
لجذب اكبر عدد من الناس تم تأجير حلقة التزحلق عالجليد في دبي مول يوم عيد الأم وجذب الاطفال بالعاب مختلفه وجلسات تصوير وحاجات تانيه كتير وطبعاً كله ببلاش
الصور من المول يوم الحفلة والابليكيشن اللي انا عملته الناس واقفة طوابير عشان تاخد الوعد وتتصور وتشوف صورتها على الشاشة الكبيرة.
الحمد لله قمت بتنفيذ وبرمجة الابليكيشن وبرمجة السيرفر لاستقبال الصور وارسال الايميلات وتم ايضاً عمل ابليكيشن لعرض الصور ودمجها مع اللوجو وتحريكها على الشاشه وعرض عداد الوعود (pledge counter) على شاشة ٣متر*٣متر على المسرح . وايضا على ٢ تليفيزيون ٨٠ بوصة
والظريف في الموضوع اني كنت بوصل الايباد بالتليفيزيون والشاشه اللي عالمسرح لعرض المحتوى ودي حاجة جديدة بالنسبة لفنيين الصوت والصورة لانهم متعودين يوصلو لابتوبات لان شاشة الايباد مش fullHd بس المبرمج الشاطر يعرف يوصل لانه يعدل على الشاشة اللي بيعرضها الايباد لو متوصل بشاشة خارجية ويعدلها انها تبقى اي حاجة مش شرط تبقى نفس الصورة اللي معروضه عالايباد اصلاً ويبقى الايباد مجرد كمبيوتر صغير بيشغل الكود اللي انت منزله علية عشان يعرض الحاجة على الشاشات الكبيرة او التليفيزيون .
تم جمع اكتر من ٤٠٠٠ وعد في اليوم دا ! واكتر من ٦٢٠٠ اجمالياً .
جاري توزيع الابليكيشن على البحرين-لبنان-الكويت لجمع اكبر عدد من الوعود .
الحمد لله حمداً كثيراً على انه ادالي الفرصه ووضعني في المكان الي اقدر فيه اساهم بحاجة زي كدا .

 
 17912_10152671508736227_2759731598708034181_n1511647_10152671508261227_7047009921013197976_n11081119_10152671627141227_2403765266409439812_n
1511647_10152671508261227_7047009921013197976_n 10406900_10152671627006227_6519037339151393273_n 10458356_10152671509516227_6882761627388696763_n 11049630_10152671509636227_182369450410548287_n 11070895_10152671509251227_7249949029350354706_n 11071025_10152671508836227_5844356952854348547_n 11080899_10152671508556227_3480167211561645257_n
Categories
Projects

Eventaform منظم الحفلات

صورة للابليكيشن Eventaform اللي انا عملته السنة اللي فاتت بيستخدمه منظمين/ات الاحتفالات لتسجيل دخول المدعوين وتنظيم الحضور، الصورة من حفلة نظمتها شركة بورش للسيارات .

 
 10506924_10152656858861227_9776526786332911_o 11076185_10152656856381227_8236092594585322925_o
Categories
Projects

Nissan Maxima X-Ray

اما عملت برنامج Nissan X-Ray كان مش مجرد شغل برمجة بس ، كان في جزء كهربا و Microcontroller و sensors والجزء دا مكانش عندي خلفيه عنه ، فروحت في فترة التجهيز للمشروع قريت كتابين واحد عن الدواير الكهربيه وواحد عن الميكروكنترولرز.

المهم المهندس المصري اللي كان بيعمل الStand الخشب قابلته عشان اقوله انا محتاج ايه توصيلات وفتحات للsensors وبتاع .

بعد كدا كان بيتفرج عليا وانا بركب الحاجه والتوصيلات ، انا لما عرفتو بنفسي قولتلو اني مهندس برمجيات ، لما شافني بعمل الحاجات دي قاللي انت اساساً مهندس كهربا مش كدا ؟

قولتلو لأ انا مهندس برمجيات ، قاللي بس دا شغل مهندسين كهربا ، قولتلو مانا لما احتاجت اعرف الحاجات دي عشان ضروريه لشغلي ذاكرتها وقريت عالنت والمعلومات متاحه للجميع بس اللي يدور.

قاللي ماشاء الله عليك انت جامعة ايه قولتلو طنطا قاللي دفعة كام قولتلو ٢٠١٠ 😀

قاللي تعرف فلان دفعتك 😀 قولتلو والله انا جامعه طنطا ودفعة ٢٠١٠ بس مش كليه هندسة 😀

قاللي امال كليه ايه؟ قولتله طب !

افتكرني بهزر طبعاً بس بعد شويه من الشد والجذب وريته كارنيه نقابة الاطباء قاللي “ياحبيبي ! ،ربنا يوفقك”

البرنامج وال Stand كانوا المفروض يشتغلو فترة رمضان اللي فات بس في عمان ودبي وابوظبي، لكن عشان حققو نجاح والناس حبت الفكرة . الStand دلوقتي موجود بصفة دايمه في معرض سيارات نيسان في ابوظبي ومعرض سيارات نيسان في الدوحة ومعرض سيارات نيسان في جدة .

البرنامج والاجهزه الالكترونيه الملحقة بيه من تصميمي وتنفيذي وتركيبي . الحمد لله

المشروع اول ما خدته اصلاً كنت خايف جدا ومكنتش عايزه يرسى عالشركه بتاعتنا عشان اكبر مني بكتير ، مكنتش فعلاً عندي خبره في الحاجات دي خالص ! بس بعد اما رسي على الشركة و عملته ووصل للي هو فيه دلوقتي حسيت قد ايه ان الواحد لازم يخرج من ال comfort zone بتاعته عشان يعرف يحقق حاجات اكتر ، وان عمر الواحد ما هيكبر طول ما هو مستريح في اللي بيعرف يعمله و مبيتعلمش غيره وان مش معنى ان الواحد معاه شهادة في حاجه وبيفهم في مجال تاني خالص انه مش هيعرف يتوغل في مجال تالت جديد ويبقى شاطر فيه ،

ان شاء الله المرة الجايه اتكلم عن Adidas Stand -Dubai Mall

11046447_10152640144896227_746799833425409531_o 11043365_10152640144871227_3486608458465491374_o 10995690_10152640188256227_8546730611115064338_o 10865822_10152640144921227_5642138300465521380_o 10481660_10152640100961227_8363774662640354_o 1900722_10152640193166227_1867754376648621416_o 887345_10152640189321227_2491865842260187775_o